Komandi tríggjar mánaðarnar avloysir danskur lækni landslæknan.
Høgni Debes Joensen, landslækni, sigur í tíðindaskrivið, at 22. januar er síðsti arbeiðsdagur hjá honum í tríggjar mánaðir, av tí at hann fer til skips. Í hansara stað kemur Per Vagn-Hansen, at virka sum vikarur til seinast í apríl.
Um Per Vagn-Hansen kann í stuttum verða nevnt, at hann varð lækni í 1969 og tók embætislæknaprógv í 1978. Hann starvaðist í fleiri ár í danska Heilsustýrinum sum lækni, eitt skifti sum yvirlækni. Hann hevur drúgvar royndir sum embætislækni, var í slíkum starvi 1982-2003 í Storstrøms Amt, og síðani 2003 hevur hann verið stjóri á ráðgevingarfyritøkuni Public Health Dialogue.
Í Danmark er Per eitt nú kendur sum undirvísari hjá pedagogum, lesandi, læknum, kommunalum starvsfólki v.m. Mest kendur man hann annars vera sum rithøvundur, og kendastu bøkur hansara eru helst ”Sundhed, miljø og hygiejne i pædagogisk arbejde (572 bls)” og ”Håndbog for dagplejere og dagplejepædagoger (197 bls)”, ið komu ávíkavist í 2006 og 2005.
