Próvtøkuroyndin ímóti GÍ sunnudagin varð ikki staðin av KÍ, sum mátti lúta 2-3 fyri gulu gestunum, og nú liggur KÍ á trið aftasta plássi við 10 stigum eftir 9 dystir. AB við5 stigum og VB/S við 3 stigum liggja á teimum báðum niðastu plássunum.
Tað gjørdist eingin hugaligur mammudagur fyri KÍ sunnudagin við Djúpumýru.
Undan dystinum lá KÍ einum 6 plássi, tvs. 5 pláss frá botninum, men eftir dystin er henda støða versnað – KÍ er nú nr. 8 og liggur triðniðast!
2 mál av
Clapson
Dysturin, sum vit siga nærri frá seinni, byrjaði annars væl við máli av Paul Clapson longu í 3. minutti eftir flott uppspæl frá Kristiani á Lakjuni, og tað kundi eins væl blivið til 2-0 í fyrra hálvleiki, men ístaðin gjørdi GÍ ein vørr beint áðrenn hálvleik, sum gav eitt mál til hálvleiksstøðuna 1-1.
Eftir steðgin vóru GÍ-ararnir hepnir at vinna eitt ivasamt fríspark langt frammi í høgru álopssíðu, sum tann annars sera dugnaligi dómarin, Petur Reinert, gav teimum, og hetta frísparkið varð upprunin til mál, og so var 2-1 til gestirnar.
Høgni Madsen og Paul Clapson vildu tað øðrvísi, tá tann fyrr nevndi legði innfyri, og amerikumaðurin heilfluktaði í mál til 2-2.
Men so var KÍ-verjan aftur nakað trilvandi, so tað bleiv pláss til Erling Jacobsen í tveimum atløgum at skjóta á KÍ-málið. Fyrra skotið bjargaði Meinhard, men bólturin stakk útaftur, og aftur var Erling fyrstur á honum og smekkaði upp undir yvirleggjaran og í málið til 3-2.
Tá var gleði og gleimur á teimum gulu, bæði leikarum og áskoðarum.
Hini úrslitini í Formuladeildini sunnudagin vóru:
NSÍ-AB 2-1
KÍ-GÍ 2-3
B36-Skála 1-1
VB/S-B71 1-4
HB-EB/S spæla mánakvøldið
Við hesum úrslitum sær stigatalvan í Formuladeildini soleiðis út:
01) EB/S 8 dystir +12 mál 21 stig
02) B36 9 dystir +10 mál 20 stig
03) NSÍ 9 dystir + 6 mál 18 stig
04) HB 8 dystir + 5 mál 14 stig
05) Skála 9 dystir – 3 mál 13 stig
06) B71 9 dystir + 2 mál 11 stig
07) GÍ 9 dystir – 6 mál 11 stig
08) KÍ 9 dystir + 3 mál 10 stig
09) AB 9 dystir – 9 mál 5 stig
10) VB/S 9 dystir –20 mál 3 stig
Sostatt er KÍ í løtuni 5 stig frá einum niðurflytingarplássi!
