Kl. gott 10 í morgun boðaði løgmansskrivstovan frá, at løgmaður Jóannes Ejdesgaard hevði sagt fiskimálaráðharranum John Dahl úr starvi.
Løgmaður sigur, at orsøkin til at fiskimálaráðharrin er sagdur úr starvi er politisk. Ov nógv rumbul hevur verið um fiskimálaráðharran og hetta hevur gjørt samgonguna óarbeiðsføra. Fyri at koma víðari við teim uppgávum, sum liggja fyri framman hevur løgmaður valt at taka hesa politisku avgerðina.
John Dahl segði við útvarpið, at hann framvegis stuðlar samgonguna í tinginum, men at hann fer at umhugsa støðu sína til Sambandsflokkin.
