Útbyggingin av einum HT depli á tekniska skúla í Klaksvík verður nú veruleiki.
Útbyggingin av Tekniska Skúla var fyri stuttum boðin alment út. Miðað verður ímóti, at byrja uppá arbeiðið síðst í árinum.
Fyrr í ár samtykti løgtingið, eina verklagslóg, ið loyvir skúlanum at fara í gongd við útbyggingararbeiði, og á seinasta býráðsfundi játtaði kommunan skúlanum byggiloyvið.
Talan er um ein 1000 fermetra HT depil í tveimum hæddum. Í ovaru hæddini verða 6 vanligar skúlastovur umframt smærri bólkarúm. Í kjallaranum verða nýmótans stovur til alisfrøði, evnafrøði, lívfrøði, og matvørutøkni.
Nú tíðarfreistin er farin fyri at fáa hendur á tilfarinum um útbyggingina, hava 16 feløg víst arbeiðinum áhugað.
Tilboðini verða latin upp tann 24 oktobur í tekniska skúla í Klaksvík. Høvið verður hjá teimum, ið hava boðið uppá arbeiðið at verða tilstaðar tá.
Roknað verður við at byrjað verður uppá arbeiði 3-4 vikur aftaná at tilboðini verða upplatin.
