Í dag, 3.novembur, verður Óla Hans Sigmund Johannessen 60 ár.
Framfúsin, íðin, tosar hart, ábyrgdarfullur og blíður. Hesi orðini kunnu av sonnum lýsa pápa ið fyllir 60 ár fríggjadagin 3. novembur.
Pápi vaks upp tey fyrstu árini heimi í Kunoy. Tá hann var blivin ein stórur smádrongur, flutti hann inn til Klaksvíkar.
Í Klaksvík kom áhugin fyri sjógvnum og tí, ið har til hoyrir, og hevur tað eyðkent pápa fram til dagin í dag.
Seinast í 60’unum fór pápi á maskinmeistaraskúla í Havn, og eftir lokið prógv, fór hann við trolaranum hjá Kjølbro.
Í 1971 bleiv hann giftur við mammu, Ingrid, sum er dóttir Óla og Soffíu Matras í Klaksvík.
Miðskeiðis í 70’unum fór pápi at sigla hjá Maersk. Eftir stutta tíð hjá Maersk, bleiv hann útnevndur ”Chief”, og minnist meg rætt, varð hann tá, ein tann yngsti ”chief’urin”, sum varð útnevndur hjá Maersk. Í 25 ár var Maersk arbeiðsplássi hjá pápa.
Tá pápi so valdi at leggjast uppá land, mátti tað hava tilknýti til sjógvin, og er hann í dag meistari á Klaksvíkar Sleipistøð, har eitt vaksandi virksemið, er komið úr hondum hansara.
Saman við synunum, hevur hann eisini tikið sær av PhotoCare, bæði sum krambakallur og sum fixari, tá ið maskinur og annað hava havt trupuleikar – ja, enntá hava teknikararnir niðri í Danmark sagt seg hava ein fínan samstarvsfelaga, og hóast hann ongantíð hevur lært seg at arbeiða við hesum, so dugir hann eisini hetta.
Heima, hava pápi og mamma fyri tíð síðani selt húsini til elsta sonin og fluttu tey oman á Heygavegin, har tey keyptu húsini hjá Palmu og Rasmusi – og eftir at hava gjørt alt av nýggjum, broyttu húsini navn til Las Palmas…eitt sera hugnaligt heim, har gestablídni altíð ræður og ein følir seg vælkomnan á gátt.
Trúfastur er pápi sum fáur, bæði í arbeiði og andaliga lívinum. Altíð til tíðina og heldur ein tíma ov nógv enn ov lítið eyðkennir hansara arbeiðssama lag. Og tað sást eisini tíðuliga, at hann hevur arva góðu evni síni eftir mammuna Andreu úr Kunoy og pápan Klávus, ið var av Húsum, men bleiv kallaður Klávus úr Kunoy. Hann hevur sítt fasta pláss í Kirkjuni hvønn sunnudag, og tað man ikki fara ta tiltak framvið í KFUM & KFUK, har hann er við. Eisini hevur hann mangan tikið orðið, og tað sæst og hoyrist, at vegurin ið hann var leiddur á, frá barnsbeini, er vegurin ið hann fylgir trúðliga, bæði í við- og mótgongd, vegurin Jesus.
Óla Hans tosar eisini hart mangan, og rópar, men hetta ger bara persónin meira veruligan. Íðin fylgir hann KÍ, men sjálvandi vísir hann stóran áhuga fyri tí onnur takast við – serliga hava vit (Finn og Andrias) uppliva, at hann fylgir væl við tá vit hava tikist við fótbólt.
Altíð ringir hann, bæði tá ið gongur við og ímóti, við góðum ynskjum ella uppmuntran. Hetta trúfesti og nærlagni, er eyðkenni fyri henda mann, og sum vit so væl kenna.
Eina hjálpandi hond til synir, abbabørn, og onnur, sigur hann ikki nei til, og ein lívsins lærumeistari fyri okkum synir hevur hann verið ógvuliga góður.
Nú fyllir hann 60 ár, og verður dagurin hildin saman við familjuni. Vit gleða okkum øll til at hátíðarhalda dagin, saman við honum og vóna nógv góð ár afturat. Seinast halda vit, at hesi orðini lýsa væl virkisfúsni hjá Óla Hans: ”Framtíðin kemur av sær sjálvum – men ikki framgongdin!”
Takk pápi fyri alt tú ert fyri okkum, vit elska teg og vóna, at vit fáa fleiri góðar løtur saman í komandi tíðum,.
Eisini ein tøkk til mammu, tí vit vita, at aftanfyri ein góðan mann, er ein góð kona. – Takk fyri tit bæði, og Jesus fylgi tykkum.
Ynskja
Andrias, Finn og Jógvan við familju.
