Enn eru teir ikki blivnir “stjørnur”, men heitið “stjørnuskot” er upp á sítt pláss, tí higartil hevur tað gingið betur hjá Team Klaksvík, enn nakar mundi tora at vóna, tá felagið fyri bara góðum ári síðan varð sett á stovn.
Viðburðurin hjá Team Klaksvík hevur higartil verið so stórur, at talan má sigast at vera um eina sólskinssøgu, tí longu í sínum fyrsta kappingarári (2006/2007) flutti felagið úr 2. deild upp í 1. deild, og har liðið liggur sum nr. 2, nú 2007 endar.
Í viðtøkunum fyri Team Klaksvík er ásett í §2, at ”endamál felagsins er at íðka og menna hondbólt í Norðoyggjum”, og higartil má sigast, at hesin setningur er rokkin og tað við lít.
Sostatt hevur hetta felag, sum sá dagsins ljós tann 12. september í 2006, higartil verið ein komét í føroyskum hondbólti. Ikki tí at rokkið longu er á mál, als ikki, men eftir bert góðum 14 mánaðum síðan stovnan hevur felagið rokkið fleiri málum og setningum.
1) Fyrsta kappingarárið flutti besta lið felagsins upp úr 2. deild í 1. deild.
2) Nú inniverandi kapping er komin í umleið helvt, liggur besta lið felagsins á einum 2. plássi, sum gevur atgongd til at spæla um uppflyting í Atlantic Airways deildina.
3) Eftir fyrsta árið uttan nakran rættiligan heimavøll og –høll, hevur felagið nú fingið ein verdugan heimavøll og felagshøli í Klaksvíkar Badmintonhøll.
4) Tað fyrsta árið hevði felagið bert tað eina liðið: fyrstalið, men longu í næsta kappingarárinum (inniverandi) hevur felagið fleiri luttakandi lið: 2. deild, unglingar og dreingir.
Hjá besta liðnum, sum nú luttekur í 1. deild, er støðan í løtuni henda:
Nr. Lið Dystir Málmunur Stig
1) H71 10 +107 (338-231) 20
2) Team Klaksvík 10 +20 (296-276) 14
3) StÍF 11 -9 (274-283) 11
4) VÍF 11 -13 (259-272) 8
5) Neistin 11 -81 (268-349) 7
6) Kyndil 11 -24 (221-245) 4
Eingin ivi er um, at kappingin fer at harðna, so hvørt sum felagið nærkast oddinum í føroyskum hondbólti, har krøvini eru størri enn í næst bestu kappingini, og tað fer tí at krevja alt meira av Fríðini og hinum í felagnum, um teir einaferð skulu náa heilt upp á hondbóltstindarnar.
Samstundis er heldur eingin ivi um, at Team Klaksvík er eitt frískt lot og ein kærkomin íblástur til føroyskan hondbólt, sum nú í fleiri ár hevur verið merktur av teimum somu, fáu feløgunum. Hesi feløg gera eitt gott arbeiði, men fólk í hesum feløgum dylja heldur ikki fyri, at tey halda tað vera gagnligt og gevandi fyri føroyskan hondbólt, at næst størsti býur í landinum eisini hevur eitt manshondbóltslið, sum vil nakað.
Sambært heimasíðuni ww w.team-klaksvik.com er nevndin í felagnum henda:
Formaður:
Fríðin Ziskason, Niðan Horn 8, tlf:216679 – fz@team-klaksvik.com
Næstformaður:
Kristian Andreasen, Kommunubrekka 15, tlf:228585 – k69a@hotmail.com
Kassameistari
Niclas Niclasen, undir Fossum 34, tlf:590909 – niclas.niclasen@foroyabanki.fo
Nevndarlimur
Meinhardt Joensen, undir Hæddini 2, tlf:219886 – meinhardtjoensen@hotmail.com
