Sum skilst, er KÍ so nær við at fáa avtalu við mannin, sum skal avloysa Eyðun Klakstein sum høvuðsvenjari, at nýggi maðurin helst verður á vøllinum til venjingina mánakvøldið kl. 18.
Meðan Eyðun Klakstein framvegis kempaði við at venda gongdini, byrjaðu nøvn á venjarum so smátt at hoyrast í krókunum sum boð upp á nýggjan høvuðsvenjara.
Serliga eru tað tvey nøvn, sum hava verserað.
Líka síðan hann var høvuðsvenjari í KÍ síðst í nítiárunum, hevur Jóannes Jakobsen aftur og aftur verðið frammi millum KÍ-fjepparar og onnur uttan um felagið, har mong halda hann vera rætta mannin til heita KÍ-stólin.
Jóannes er væl umtóktur, tí fólk minnast hann frá árunum 1996-98, tá ið KÍ hevði sera góð úrslit.
Hitt navnið, sum eisini er seiglívað millum KÍ-fólk í løtuni, er Petur Mohr.
Petur Mohr er maðurin, sum vann føroyameistaraheitið við KÍ í 1991. Sostatt er hann tann seinasti føroyski venjarin, sum hevur vunnið FM við KÍ, og tí er einki løgið í tí, at fólk nevna hann sum nýggjan skipara á flaggskipinum, nú tað brýtur í bæði borð.
Í skrivandi løtu (sunnukvøldið 7/9-08 kl. 23:30) er tað tó als ikki vist, at maðurin, sum verður á Injector Arena í annaðkvøld (mánakvøldið) verður antin Petur Mohr ella Jóannes Jakobsen, tí enn er einki váttað av KÍ.
Tað kann tí gjarna verða ein heilt triðji persónur.
Vit bíða í spenningi, og uttan iva verða nógvir áskoðarar við Injector Arena í annaðkvøld, tá ið svarið vónandi gongur á vøllinum.
KOYR Á KÍ !!!
