Talvsamband Føroya og Klaksvíkar Talvfelag skipa fyri Klaksvík International 2008 í døgunum 11. – 18. oktober 2008, har ikki færri enn 4 stórmeistarar og 2 altjóða meistarar verða við.
Talan er um sera forkunnuga kapping, skrivar www.faroechess.com.
Ikki minst tí, at talan er um sterkastu talvkapping, sum telvað er í Føroyum nakrantíð !
Meðalstyrkin á luttakarunum er 2429.
Heili 4 stórmeistarar og 2 altjóða meistarar, luttaka, saman við føroyingunum Heina Olsen, Martin Poulsen og Olaf Berg.
Telvað verða 9 umfør – "allir ímóti øllum".
Heini kann gerast
altjóða meistari
Serliga spennandi verður, hvørt lokali Heini Olsen megnar at vinna sín triðja og seinasta IM-norm í kappingini – á heimavølli – sum harvið tryggjar honum heitið Altjóða Meistari í Talvi (IM).
Evnaríku – ungu havnatelvararnir – Martin Poulsen og Olaf Berg hava somuleiðis møguleikan av álvara at taka av tilboðnum um at byrja IM-leiðina, um úrslitini laga seg eftir vild.
Telvað verður í Klaksvík – "fimleikahøllini" við musikkskúlan.
Altjóða dómarin, Arild Rimestad, verður dómari, meðan Finnbjørn Vang, fyriskipari, leiðir kappingina.
Umhugsunartíðin verður 90 min. til 40 leikir + 30 min. til restina av talvinum + 30 sek. frá fyrsta leiki.
Virðislønir: 1) 7.000, 2) 5.000, 3) 3.000.
Skráin fyri kappingina er hendan:
11. oktober: leygardag kl. 14:00 1. umfar
12. oktober: sunnudag kl. 16:00 2. umfar
13. oktober: mánadag kl. 14:00 3. umfar
14. oktober: týsdag kl. 14:oo 4. umfar
15. oktober: mikudag kl. 10:00 5. umfar
15. oktober: mikudag kl. 18:00 6. umfar
16. oktober: hósdag kl. 14:00 7. umfar
17. oktober: fríggjadag kl. 09:30 8. umfar
18. oktober: leygardag kl. 09:30 9. umfar
18. oktober: leygardag kl. 14:00 Virðislønarhandan
www.faroechess.com skrivar, at møguleiki verður at fylgja telvingini – LIVE – øll umførini!
