Í kvøld kl. 19.30 verður Klaksvíkar søga 2 løgd fram í Býráðshøllini. Øll eru vælkomin.
Á skránni er:
Sangur við Suð
Gunnvá við Keldu heldur røðu
Elin Súsanna Jacobsen umrøður verkið
Hans Andrias Sølvará greiðir frá arbeiðnum við verkinum
Í hesum sambandi fæst bókin fyri 300 kr. – 88 kr. bíligari enn í bókabúðunum – um hon verður avheintað á staðnum.
—
Um Klaksvíkar søgu 2
Í tíðarbilinum frá 1856 til 1940 vaks fólkatalið í Klaksvíkar kommunu úr umleið 280 upp í umleið 2200. Henda bókin er um hetta skeiðið.
Tað er í hesum skeiði, at m.a. stóra fyritøkan hjá Beck og Sønner mennist úti í Klaksvík, og tað er í hesum tíðarskeiðnum, at Joen Fredrik Kjølbro, vanliga bara nevndur Kjølbro, mennir sína stóru reiðara- og handilsfyritøku í Klaksvík. Ta fyritøkuna, sum gjørdist størsta handilsfyritøkan í Føroyum longu í 1930-árunum.
Tað er eisini um hetta mundið, at brøðrasamkoman, sum fekk stóran týdning fyri vinnuligu og mentanarligu gongdina í Klaksvík í 20. øld, festir røtur og fær stóra undirtøku í Klaksvík.
Tað er hetta vinnuliga og mentanarliga byltingarskeið, 2. bind av Klaksvíkar søgu snýr seg um.
