– Eg kenni ikki til styrkina á liðunum á Malta í løtuni, men sum útgangsstøðið haldi eg, at hetta er eitt spennandi lutakast, har vit hava ein møguleika at spæla okkum víðari, sigur KÍ venjarin Mikkjal K. Thomassen.
KÍ skal spæla ímóti Birkirkara frá Malta í Europa League. Eitt lið, sum veruliga hevur gjørt um seg í Europa seinnu árini, men í KÍ er man nøgdur við lutakastið, tí man vildi sleppa undan liðunum frá Litava og Wales.
– Hatta er eitt spennandi lutakast og vit halda okkum hava ein møguleika at koma víðari. Men eg havi ikki sett meg inní styrkina hjá Birkirkara enn, so tað er eitt sindur trupult at meta um. Fyri framman liggur eitt stórt greiningararbeiði, og tað byrja vit so smátt uppá nú, tá tíðin er til tað, men ikki fyrr enn báðir landskappingardystirnir eru spældir kunnu vit seta fult fokus á Europa League uppgávurnar. Eg havi góð minnir frá Birkirkara, tí vit slerdu teir út í 2006. Tá vóru vit fysiskt betri fyri, men teir høvdu góðar leikarar. Teirra kapping liggur still nú og ofta eru hóparnir ikki endaliga mannaðir, so tað kann geva okkum ein fyrimun. Hinvegin kann hitin á Malta vera ein avbjóðing, sigur Mikkjal K. Thomassen, sum vónar at fáa eitt nóg gott úrslit á Malta í fyrra dystinum til, at KÍ á heimavølli skal hava ein realistiskan møguleika at koma víðari.
