Umboðsmaðurin hevur verið á eftirlitsvitjan í sambýlunum á Traðarvegi og undir Fobbakletti í Sandavági. Umboðsmaðurin gjørdi í hesum sambandi vart við, at húsini undir Fobbakletti ikki vóru mett egnað sum bústaður.
Eftirlitsvitjan á sambýlunum á Traðarvegi og undir Fobbakletti í Sandavági
Umboðsmaðurin hevur verið á eftirlitsvitjan í sambýlunum á Traðarvegi og undir Fobbakletti í Sandavági.
Umboðsmaðurin gjørdi í hesum sambandi vart við, at húsini undir Fobbakletti ikki vóru mett egnað sum bústaður. Leiðslan á sambýlinum tók beinanvegin stig til at flyta búfólkini í hóskandi hølir og heitti á landsverk um at gera tilmæli um, hvat skal gerast av umvælingum. Hetta tilmæli er enn ikki komið.
Á eftirlitsvitjani staðfesti umboðsmaðurin millum annað, at Nærverkið (nú Almannaverkið) og Almannamálaráðið, ikki hava útint sínar eftirlitsskyldur, sum eru álagdar myndugleikunum íkunngerð um, hvussu sambýli skulu skipast og kunngerð um valdsnýtslu. Eftirlitsskyldan fevnir millum annað um, at hoyringsreglur verða hildnar, tá búfólk skulu flyta inn í sambýli, eftirlit við sambýlunum sum heild, tað vil siga eftirlit við bæði námsfrøðiliga støðinum í sambýlunum, eitt heilsufakligt eftirlit, eftirlit við fíggjarviðurskiftunum, íroknað hvussu húsaleigan verður ásett, við fysisku umstøðunum í sambýlunum, við valdsnýtslu og umsitingini í sambýlunum annars.
Umboðsmaðurin helt taðikki vera nøktandi, at ongar mannagongdir eru fyri, hvussu myndugleikarnir útinnir sína eftirlituppgávu við sambýlunum og heitti á myndugleikarnar um at gera mannagongdir fyri, hvussu eftirlið við sambýlum skal útinnast. (j.nr. 201200026)
