Johan Dahl, landsstýrismaður í vinnumálum, er hesa vikuna á arbeiðsvitjan í London.
| Í dag hevur landsstýrismaðurin verið á fundi við Malcolm Webb, stjóra fyri bretska oljuídnaðin, og við Simon Toole, loyvisstjóra í bretska Oljumálaráðnum. Í morgin fer landsstýrismaðurin at bera fram røðu á aðalfundinum hjá IMO, ið er felagsskapur Sameindu tjóða fyri sjóvinnu. Mikudagin verður landsstýrismaðurin vertur fyri móttøku á sendistovuni, har ljós verður varpað á oljuleiting í føroyskum øki. Høvuðsrøðari verður Tim Dodson, varastjóri fyri Statoil. Hósdagin luttekur landsstýrismaðurin á tiltaki um Arktis, sum sendistovan hjá Noregi skipar fyri. Millum gestirnar verða norski og bretski uttanríkisráðharrarnir. Tað er sendistovan í London, sum hevur lagt vitjanina til rættis. Í føroysku sendinevndini eru umboð fyri Jarðfeingi, Sjóvinnustýrið, og Føroyska oljuídnaðarbólkin (FOÍB). |
