Føroyska U-21 landsliðið í hondbólti framdi eitt bragd í Grikkalandi í kvøld.
Dysturin móti vertstjóðini endaði við javnleiki, 21-21. Hálvleiksstøðan var 8-7 til Grikkaland.
Føroyar høvdu góðan møguleika at vinna dystin, tí tá seinni hálvleikur var nakað liðin, vóru Føroyar á odda við tveimum málum, skrivar heimasíðan hjá Kringvarpinum.
Grikkar svaraðu tó aftur, og tá minni enn ein minuttur var eftir av dystinum, vóru grikkar á odda við einum máli.
Tað eydnaðist tó Føroyum at javna í allarsíðsta álopinum í dystinum. Helgi Hoydal syrgdi fyri málinum.
Grikkaland varð undan dystinum mett sum stórur favorittur, og tí telist hetta úrslitið millum størstu brøgdini í føroyskari hondbóltssøgu.
Føroyska U-21 landsliðið skal aftur í morgin spæla HM-undankappingardyst. Tá verður Serbia mótstøðuliðið. Serbia verður mett sum sterkasta tjóðin í bólkinum, skrivar Kringvarpið á síni heimasíðu.
Grikkaland – Føroyar 21-21 (8-7)
Kjartan Johansen, 8 mál
Julian Olsen, 4 mál
Eirikur Simonsen, 2 mál
Áki Egilsnes, 2 mál
Allan Norðberg, 2 mál
Helgi Hoydal, 1 mál
Rói B. Hansen, 1 mál
Pætur Thomsen, 1 mál
