(Budapest) Áhugin fyri landsdystinum í Budapest millum Føroyar og Ungarn er stórur og væntandi verður útselt, tá spælt verður kl. 19.45 í kvøld.
Norðlýsið er komið til Groupama Aréna, har stórfelagið í Ungarn Ferencvárosi til dagligt spælir sínar heimadystir, og umstøðurnar eru av teimum bestu. Turt, stilt og ein framúrskarandi vakur leikvøllur. Helst tann vakrasti, sum nógvir av leikarunum hava spælt á.
Sum skilst verður væntandi útselt og tað merkir, at eini 24.000 áskoðarar vera á leikvøllinum. Teir fyrstu síggjast longu runt um vøllin, hóast næstan hálvur annar tími er til dystarbyrjan.
Hálvanannan tíma áðrenn dystarbyrjan vóru leikararnir frá báðum liðunum úti á vøllinum og hugdu eftir vøllinum.
Føroyar byrja í hesi uppstilling (4-2-3-1): Gunnar Nielsen – Jónas Tór Næs, Atli Gregersen, Sonni Ragnar Nattestad, Viljormur Davidsen – Rógvi Baldvinsson, Sølvi Vatnhamar – René S. Joensen, Róaldur Jacobsen, Kaj Leo í Bartalsstovu – Jóan Símun Edmundsson.
