Komandi A-landsliðsvenjarin hjá Danmark vitjar KÍ hetta vikuskiftið.
47 ára gamli Kasper Hjulmand hevur m.a. vunnið danska meistaraheitið við FC Nordsjælland og eisini hevur hann verið venjari hjá Mainz í Týsklandi. Fyri nøkrum mánaðum síðani bleiv hann valdur av DBU at standa á odda fyri danska landsliðnum eftir EM-undankappingina í summar. Talan er sostatt ikki um ein og hvønn sum vitjar KÍ.
Í gjárkvøldið hevði hann eina sera áhugaverda framløgu fyri KÍ-sponsorum og øðrum gestum á KÍ-loftinum. Í dag fylgir hann venjingini hjá KÍ og gevur KÍ-venjarunum íblástur. Tá Norðlýsið var á staðnum og tók myndir, tá høvdu Kasper Hjulmand og Mikkjal K. Thomassen fakligt kjak áðrenn venjingina hjá KÍ í dag.
Kasper Hjulmand skal eftir ætlan eisini síggja stórsteypadystin millum KÍ-HB í morgin. Norðlýsið hevur meir um vitjanina hjá Kasper Hjulmand í blaðnum mikudagin, har vit koma inná okkurt, sum hann legði fram fyri gestunum í gjárkvøldið.
