Arbeiðið við at endurskoða og dagføra fleiri tættir í Stýrisskipan Føroya er nú byrjað.
Fyrrapartin hava løgmaður og formenninir í flokkunum umrøtt fleiri viðurskifti í stýrisskipanarlógini.
Løgmaður hevur gjørt greitt, at hann heldur, at tíðin er búgvin at endurskoða lógina í einari heild.
Á fundinum fyrrapartin vórðu hesi viðurskifti millum annað umrødd:
- Almennu heitini á løgtingsformanni, løgtingsmonnum, løgmanni og landsstýrismonnum
- 55 í stýrisskipanarlógini um, at millumtjóða sáttmálar eru yvir føroyskari lóggávu
- Fíggjarparturin
- Um tey undir verjumáli eisini eiga at fáa valrætt til Løgtingið
”Stýrisskipanin er oman fyri aðra lóggávu, og tí eiga broytingar í lógini at hava eina breiða politisku undirtøku. Eg vóni tí, at vit í felag, kunnu stinga úti í korti, hvørjar broytingar skulu gerast” heldur Bárður á Steig Nielsen, løgmaður.
Stýriskipan Føroya varð samtykt á Føroya løgtingi í 1994. Hon er at kalla ikki broytt síðani.
Verða stig tikin at broyta stýrisskipanarlógina, so krevst, at tvey Løgting samtykkja broytingarnar.
