Hósdagin 8. januar fara Aksel V. Johannesen, løgmaður, Sirið Stenberg, landsstýriskvinna í almanna- og mentamálum, Høgni Hoydal, landsstýrismaður í uttanríkis- og vinnumálum, og Ruth Vang, landsstýriskvinna í fíggjarmálum, til Keypmannahavnar. Á skrá er ávegis ríkisfundur og fundur í samstarvsráðnum.
Hetta er aðru ferð at skipa verður fyri ávegis ríkisfundi og fundi í samstarvsráðnum í januar mánaði. Fyrstu ferð var í fjør.
Føroyar yvirtóku um ársskiftið formansskapin í samstarvsráðnum, og vanligi ríkisfundurin og fundurin í samstarvsráðnum verða tí í Føroyum í juni.
“Tíverri gerst støðan í heiminum alsamt meiri spent og óviss. Tað er kríggj í Ukraina og Miðeystri, og stórveldini vísa ein øktan áhuga fyri Arktis og norðurleiðum. Tí hevur tað størri týdning enn nakrantíð áður, at Føroyar, Danmark og Grønland hittast regluliga á ráðharrastigi og umrøða uttanríkis- og trygdarpolitisku støðuna, og hvussu hetta ávirkar samstarvið millum londini.“ Aksel V. Johannesen, løgmaður
Til ríkisfundin, luttaka løgmaður, danski forsætisráðharrin, Mette Frederiksen, og grønlendski landsstýrisformaðurin, Múte B. Egede. Á fundinum fara tey trý at umrøða samstarvið í ríkisfelagsskapinum og at kunna um búskaparligu og politisku gongdina í londunum.
Síðani verður fundur í samstarvsráðnum, har føroysku umboðini luttaka saman við viðkomandi donskum og grønlendskum ráðharrum. Á fundinum skulu londini umrøða uttanríkis- og trygdarpolitisku støðuna.
Faktaboks – luttakarar til fundin í samstarvsráðnum
Føroyar
Aksel V. Johannesen, løgmaður
Sirið Stenberg, varaløgkvinna og landsstýriskvinna í almanna- og mentamálum
Høgni Hoydal, landsstýrismaður í uttanríkis- og vinnumálum
Ruth Vang, landsstýriskvinna í fíggjarmálum
Danmark
Mette Frederiksen, forsætisráðharri
Lars Løkke Rasmussen, uttanríkisráðharri
Troels Lund Poulsen, verjumálaráðharri
Peter Hummelgaard, løgmálaráðharri
Grønland
Múte B. Egede, landsstýrisformaður
Vivian Motzfeldt, landsstýriskvinna í uttanríkis- og sjálvstýrismálum
Naaja H. Nathanielsen, landsstýriskvinna í vinnu-, ráðevnis-, lógar- og javnstøðumálum
Erik Jensen, landsstýrismaður í fíggjarmálum
