Pixi-opera við íblástri úr kendu operuni “Carmen” eftir Bizet verður á Tjóðpallinum komandi vikuskiftið.
Á pallinum er nýggi gentuleikbólkurin hjá Opera.fo “Operetturnar”; 16 gentur í aldrinum 9-15 ár, sum spæla sjónleik og ljóðføri, syngja og dansa.
“Carmen” er ein av populerastu operunum, sum nakrantíð er skrivað, og er hon á tremur við kendum tónum, sum Habanera og Toreador – sum nú eru umyrktir til føroyskt.
Henda útgávan er tillagað til ein yngri málbólk – børn í skúlaaldri. Tó kunnu yngru børn saktans koma, saman við vaksnum.
Leikurin snýr seg um ein leikbólk, sum ferðast runt og sigur søgur um ta kendu Carmen, sum sigst hava stolið loyniligu lakrespípu-uppskriftina frá lakrespípuvirkinum, har tær allar plagdu at arbeiða.
Leikurin er uml. 35 min.
Handrit og leikstjórn: Birita Adela Davidsen
Koreografi: Diana J. Hansen
Hjálparfólk: Anny Joensen Thorsen
Plakat: Kjartan Magnussen
Myndir: HeinesenMyndir
Sýningar verða á Tjóðpalli Føroya
Leygardagin 18/1 kl. 14:00 og 15:30
Sunnudagin 19/1 kl. 14:00
Atgongumerki fáast www.atgongumerki.fo
