Jóhannes Miðskarð stillar upp fyri Venstre í Keypmannahavn

Jóhannes Miðskarð úr Klaksvík stillar upp til kommunuvalið í Keypmannahavn fyri flokkin Venstre. Valdagurin er 18. november 2025, og tá skulu veljast 55 limir í Borgerrepræsentationen, sum er kommunustýrið í danska høvuðsstaðnum

Jóhannes er sonur Andras Miðskarð, sála, sum var ein virkin og álítandi maður í Sambandsflokkinum. Tann politiski áhugin og ábyrgdar­kenslan hava fylgt Jóhannesi víðari í lívinum, og í dag er hann sjálvur virkin í lokalpolitikki í Keypmannahavn.

Hann sit­ur í Amager Vest Lokaludvalg, sum arbeiðir við menningini av nærumhvørvinum í Ørestad og á vestaru síðu av Amager. Eisini er hann leikdómari í Eystara Landsrætti, útnevndur av Venstre.

Men røturnar hjá Jóhannesi eru djúpt grundaðar í Klaksvík.

– “Eg eri uppvaksin í einum býi, har fólk standa saman og hjálpast at. Tað hevur merkt meg alla tíðina – bæði í arbeiðslívi og í lívsáskoðan,” sigur hann.

Sum ungur arbeiddi hann á Kósini, á roykivirkinum og sum málari á bedingini í Klaksvík. Hesi arbeiði hava givið honum djúpan virðing fyri arbeiðssemi, felagsskap og tað at gera eitt gott dagsverk.

– “Tað lærdi meg, at onki arbeiði er ov lítið, og at øll hava týdning fyri, at samfelagið virkar,” sigur hann.

Hann minnist eisini væl tíðina sum skóti í Klaksvík, har hann lærdi at leiða og at taka ábyrgd, eisini tá tað var kalt og mótbrekkan long. “Skótalívið gav mær nógv av somu virðum, sum eg síggi aftur í Venstre – virðing fyri frælsi, ábyrgd og felagsskap,” leggur hann afturat.

Hann hevur eisini skipað føroyskar tiltøk og samstarv millum føroysk feløg, og hann var ein av fyriskiparunum av Fólkafundinum í Klaksvík, sum savnaði fólk til kjak um framtíð og menning í Føroyum.

– “Eg eri stoltur av at koma úr Klaksvík. Tað, eg havi lært har, taki eg við mær inn í alt, eg geri – eisini her í Keypmannahavn. Tað handlar um arbeiðssemi, álít og virðing fyri fólki. Tað eru somu virðir, eg vil hava inn í býpolitikki her,” sigur hann.

Við drúgvum arbeiðslívi innan útbúgving, leiðslu og menning, og við hjarta í Føroyum, vil Jóhannes arbeiða fyri, at føroyska røddin hoyrist sterkari í Keypmannahavn.