Er Kular Røtur eitt frísk træ við fleiri vøkrum greinum, so er bulurin Jógvan Hansen og Rakul Ró Steintórsdóttir, sum syngja orðini og spæla sjónleikin í nýggjum sangi og videolagi.
Eg vil ikki í skúla er upptikin í Íslandi, har Jógvan Hansen; eftir at hava gjørt Bilin hjá okkum, Hon er omma mín og Grønar menn frá Pluto kendar í Føroyum, hevur búð og virkað sum tónleikari. Røddin hjá Rakul Ró er sungin inn í Mike Studio í Klaksvík.
Ta skemtuligu skúlasøguna um mammudreingin, sum hevur skúlafobi ella bara ikki vil í skúla, hevur Steintór Rasmussen skrivað.
Sangurin er tann fyrsti í nýggjari Kular Røtur røð og er nú tøkur at hoyra og síggja á You Tube, Spotify og øðrum talgildum miðlum.
Videolagið er ein serstøk UFO produktión. Upptikið og filmað við niðursettari ferð og sett saman sum ein gomul 24 tíma framleiðsla.
