Svimjarar, venjarar, hjálparfólk og nevndarlimir í Ægi møttust mánakvøldið í Klaksvíkar Svimjihøll, har felagið skipaði fyri einum hugnaligum endabresti fyri veturin 2002/03.
Tað var gott lag á fólki í svimjihøllini mánakvøldið, nú Svimjifelagið Ægir sluttaði av fyri veturin. Ikki tí tað verður ivaleyst svomið og vant víðari út á summarið eingin ivi um tað men fyri tey yngru var hetta endabresturin fyri fyrst. Tey byrja aftur at venja beint eftir summarfrítíðina.
Hetta kvøldið sluppu allir svimjarar í Ægi at luttaka í eini lítlari innanhýsis svimjikapping.
Fyrst vóru tað tey yngstu, sum sluppu at royna seg í lítla hyli, meðan øll hini hugdu at. Síðani varð farið yvir í kappingarhylin, har tey størru lupu útí. Fyrst tey elstu, og síðani niðureftir, til øll høvdu luttikið í einari kapping í part.
Hóast hendan kappingin ikki hevði tann stóra týdningin, so legði ein til merkis, at svimjararnir høvdu stóran áhuga í, hvørja tíð tey høvdu svomið. Alt var gjørt í einum góðum og hugnaligum anda jú, svimjararnir duga sera væl at hugna sær saman.
Føroya Banki hevur latið heiðursmerki, sum eftir loknar kappingar vórðu handaði svimjarunum, og so var myndatøka fyrst av venjarunum hjá Ægi í vetur, og síðani av øllum svimjarunum.
Ein sera hugnalig løta í svimjihøllini, har eisini onkur foreldur nýttu høvið at vera við og hyggja at aftur við einum kaffimunni.
