Fríggjadagin kl. 14 verður eitt uppskot til nýtt mentanarhús í Klaksvík almannakunngjørt í Býráðshøllini.
Fýra føroysk arkitektafeløg eru biðin um at gera hvør sítt uppskot til umbygging av verandi posthúsi. Ætlanin er, at verandi skap skal verða varðveitt, men harumframt skulu góðir 1.100 fermetrar byggjast afturat við høll og øðrum hentleikum.
Øll innkomnu uppskotini verða víst fram í morgin og vinnari verður kosin.
Býráðið keypti í síni tíð posthúsið, og síðani tá hevur Grunnur, Mentanarhús í Klaksvík staðið fyri bygninginum. Ein neyv byggiskrá er gjørd fyri húsið, sum við einum uppíbygningi skal hýsa Norðoya Listafelag, Klaksvíkar Sjónleikarafelag, Klaksvíkar býráð (við býráðssali), spæli” og venjingarverkstaði, Dávavirkinum, Klaksvíkar Tónleikarafelag, og øðrum brúkarum eins og spontanum tiltøkum.
Eisini eru løgd inn gongu- og veruøki við kaféumhvørvi og einum stórum sali, sum skal hýsa í minsta lagi 300 fólkum.
Býráðssalurin skal kunna brúkast til onnur tiltøk enn býráðsfundir, eins og býráðssalurin skal kunna vaksast við hjáliggjandi hølum, tá mál við serliga stórum áhuga eru á skránni.
Arkitektafeløgini sum hava gjørt uppskot eru:
FuglArk
Map Arkitektar
Ósbjørn Jacobsen
Arkitektar99
Í stýrinum fyri Grunnin, Mentanarhús í Klaksvík sita:
Signhild V. Johannesen, forkvinna
Jógvan Skorheim
Gunvá við Keldu
Archibald Black, vegna Norðoya Listafelag
Rudolf Joensen vegna Klaksvíkar Sjónleikarafelag
Sif Gunnarsdóttir, stjóri í Norðurlandahúsinum
