Tað var sama søgan hjá Føroyum í áttanda umfari móti Portugal mánadagin sum í sjeynda umfari móti Íslandi sunnudagin í EM-kappingini fyri talvlandslið í Batumi.
Vit taptu 2½ – 1½.
Og innanhýsis fullu stigini meinlík í báðum dystunum. Brøðurnir Rógvi og Høgni eru álitið. Rógvi vann, og Høgni telvaði javnt. Luitjen og Martin taptu aftur við svarta fólkinum.
Javnleikurin hekk í luftini, tí Martin átti av røttum at fingið endatalvið javnt, men hann fór skeivur og tapti.
EM – 8. umfar, Batumi
Føroyar – Portugal 1½ – 2½
IM Høgni Egilstoft Nielsen 2389 – IM Andre V. Sousa 2433 ½ – ½
Luitjen A. Apol 2318 – Jose Barria 2376 0 – 1
Rógvi Egilstoft 2304 – Bruno Martins 2363 1 – 0
Martin Poulsen 2276 – IM David Martins 2430 0 – 1
Føroyar hava tí framvegis bara tvey stig fyri sigurin á Skotlandi. Vit eru nummar 39 og næstaftast fyri seinasta umfar týsdagin.
Seinasta umfar
Dystirnir í níggjunda og seinasta umfari byrja longu klokkan níggju týsmorgunin føroyska tíð.
Føroyar telva móti Georgia D.
Tað er spenningur í oddanum. Ukraina og Aserbadsjan eru fremst við trettan stigum. Síðani koma Holland, Ongland og Serbia við ellivu stigum.
