Bláa Bylgjan hevur valt sínar ársins leikarar og stjørnuskot hjá kvinnum og monnum í 2014.
Bláa Bylgjan hevur á hvørjum ári síðani 2010 valt ársins leikara hjá monnum. Í 2011 bleiv hetta ment til at eisini umfata stjørnuskot og har kvinnurnar eisini blivu valdar. Í ár dró út at fáa hetta kunngjørt, tí leingi var ivamál, um KÍ veitslan, har ársins bestu vanliga vera kunngjørdir, fór at blíva ella ikki.
Hjá monnunum vera dagsins tríggir bestu leikarar valdir til hvønn dyst gjøgnum árið og har er samanlagdi listin eitt gott barometur fyri, hvør verður valdur. Hjá kvinnunum verða serfrøðingar, sum hava fylgt KÍ í kvinnukappingini tætt, spurdir og so verður ein støða tikin útfrá tí. Ein leikari kann bara vera ársins stjørnuskot einaferð, tí hetta er ein heiður fyri ein ungan leikara, sum hetta árið hevur fingið sítt gjøgnumbrot.
Rannvá og Gudný
Ársins leikari hjá kvinnum er Rannvá B. Andreasen. Rannvá var aftur í ár sannførandi á góða KÍ liðnum, sum vann greipuna. Hon skoraði 29 mál í landskappingini. Ársins stjørnuskot hjá kvinnum er Gudný Johannessen. Gudný hevur veruliga sligið sítt navn ígjøgnum í ár og hóast bara 16 ára gomul, so spældi hon við í 16 av 20 landskappingardystum. Hon skeyt 4 mál og var eisini liðskipari á føroyska U17 kvinnulandsliðnum, sum spældi í summar.
Ndende og Jóhan
Hjá monnunum bleiv Ndende Adama Guéye valdur til ársins leikara. Ndende var sannførandi á KÍ liðnum, har hann fyri tað mesta spældi á sentrala miðvøllinum. Hann skoraði 6 mál og legði upp til 5 mál og var tann útileikarin, sum spældi flestar minuttir. Ársins stjørnuskot var Jóhan Jacobsen. Jóhan fekk sítt veruliga gjøgnumbrot í ár, har hann var væl leikandi á høgra bakki.
Leikararnir sum hava vunnið heiðurin sum ársins leikarar hjá Bláu Bylgjuni eru hesir:
Ársins stjørnuskot, kvinnur:
2011: Eyðvør Klakstein
2012: Katrina Akursmørk
2013: Monika Biskopstø
2014: Gudný Johannessen
Ársins leikari, kvinnur:
2011: Rannvá B. Andreasen
2012: Rannvá B. Andreasen
2013: Maria K. Thomasen
2014: Rannvá B. Andreasen
Ársins stjørnuskot, menn:
2011: Álvur Christiansen
2012: Páll A. Klettskarð
2013: Oddmar Marsten
2014: Jóhan Jacobsen
Ársins leikari, menn:
2010: Sørmundur Kalsø
2011: Hjalgrím Elttør
2012: Páll A. Klettskarð
2013: Páll A. Klettskarð
2014: Ndende Adama Guéye
