Týsdagin 8. september var landsstýrismaðurin í mentamálum, Bárður á Lakjuni, á stuttari vitjan hjá Karl Johansen, borgarstjóra í Klaksvíkar Kommunu.
Borgarstjórin hevði boðið landsstýrismanninum norður at tosa um mál av felags áhuga, sum bæði Mentanálaráðið og kommunan varða av.
Høvuðsøkini hjá Mentamálaráðnum eru mentan, útbúgving, gransking og barnaøkið, og millum felags málsøki hjá kommununi og aðalráðnum kunnu nevnast mentamál, ítróttamál, barnaøkið, dagstovnar, námsfrøðilig ráðgeving, fólkaskúlamál, bókasavnsøkið og barnaverndarøkið.
Partarnir nýttu høvið at kunna hvønn annan um arbeiðið innan nøkur av hesum málsøkjum og samskiftu um tørvir, avbjóðingar og møguleikar.
Á myndini síggjast frá vinstru: Torkil V. Rasmussen deildarstjóri, Sonni Óli Djurhuus kommunustjóri, Bárður á Lakjuni landsstýrismaður, Karl H. Johansen, borgarstjóri, John Færø trivnaðarstjóri og Poul Geert Hansen aðalstjóri.
