Norsku meistararnir fingu ikki bestu upptaktina til dystin móti KÍ.
Bodø/Glimt hevur havt eitt óstøðugt kappingarár higartil. Tá sá út til at verða komið glið á, men í dagfekk liðið aftur eitt afturstig, tá liðið tapti 3-2 á útivølli móti Odd, sum hevur føroyska Gilla R. Sørensen í felagnum. Hann var tó ikki í hópinum í dag. Bodø/Glimt var leikliga omaná, sum teir gulu næstan altíð eru, men sóu út til at barga sær ein avnleik í 97. minutti. Men í síðstu sekundunum av yvirtíðini fekk heimaliðið brotsspark, sum teir skoraðu uppá til urslitið 3-2.
Venjarin hjá Bodø/Glimt, Kjetil Knutsen, er í øðini í norskum miðlum um brotssparki, sum hann heldur verða skeivt dømt. Bodø/Glimt liggur á 5. plássi í deildini, átta stig aftanfyri oddaliðið Lillestrøm.
Bodø/Glimt spælir mikudagin kl. 17.00 á heimavølli móti KÍ í fyrra dystinum í 1. umfari í Champions League. Har er Bodø/Glimt stórfavorittur at vinna.
