Nógv fólk var samankomið á Fossánesi í kvøld, har Landsverk og Sev høvdu kunnandi fund um arbeiðið í tunlunum, sum fer at hava við sær, at tunlarnir skulu steingjast
Nógv fólk var samankomið á Fossánesi í kvøld, har Landsverk og Sev høvdu kunnandi fund um arbeiðið í tunlunum, sum fer at hava við sær, at tunlarnir skulu steingjast
SEV kunnaði um, at talan er um útbygging av netinum og at ein øktur tørvur er á streymi norðanfyri.
Landsverk kunnaði síðani um at stongt verður sunnu- til hóskvøld 23-05:30, har tunnilin bert er opin fyri ferðslu kl.1.
Eftir kunningina var møguligt at seta spurningar og gera viðmerkingar.
Undir tí partinum av fundinum nýttu fleiri møguleikan at seta spurningar og gera viðmerkingar.
Tað vóru serliga spurningar og viðmerkingar til viðgerðina av málinum, alternativar loysnir og trygdin, sum vórðu havd á lofti.
Í samband við viðgerðina hevði Landsverk ilt við at svara, hví ongin var hoyrdur í málinum. Kommunurnar og borgarstjórarnir vóru ikki hoyrdir. Borgarstjórarnir Irdi Jacobsen og Hans Jákup Kalsberg, sum bæði vóru á staðnum umboðandi ávikavist Hvannasunds og Viðareiðis kommunu váttaðu hesum. Somuleiðis váttaði Finn Hansen, sum er tilbúgvingarleiðari, at hann ikki var hoyrdur. Av tí sama kendi borgararnir seg ikki hoyrdar. Áheitan bleiv sett fram um at lata málið ganga umaftur, men til tað var tøgn frá myndugleikunum men klapp frá áhoyrarunum.
Í samband við alternativar loysnir vóru fleiri ymsar alternativar loysnir nevndar. Mest ítøkiliga loysnin, sum bleiv nevnd av einum borgara var, at smoltstøðirnar hava generatorskipanir, sum eru nóg stórar at forsýna alt økið við streymi. Tí undrast fólk á, at man hevur valt at taka einastu farleið fólkið hevur og steingja hana.
Harafturat var spurt eftir trygdini í tunlunum og hvør hevði ábyrgdina av at kunna um trygdina, heldur ikki har, var nakað svar hjá áhoyrarunum at heinta.
Sum heild vóru svarini frá Landsverk sera jánkarslig og hingu illa saman.
Á veg av fundi skemtaðu sundafólk við, at tunlarnir vóru stongdir og tað var ikki til at koma yvir.
Sum ein facebook-viðmerkjari skrivaði í kvøld:
“Eitt stórt bluffnummar av SEV og Landsverk, sum eisini avsløraði djúpa ókompetansu, har í einki samskifti hevur verði við týdningamiklastu partanir og eingin klárar at svara fyri trygdini.
Hetta má ikki vera seinasti leikur!”
