Millum annað tað, segði Beinta Klakstein, býráðslimur í røðu síni í kvøld, tá ljósið á listaverki Edwards bleiv tendrað á Skúlanum á Skúlatrøð í kvøld. Røðan kann lesast her:
Gott kvøld góðu tit øll
Hesa løtuna havi eg glett meg til. Og eg ivist ikki í, at tað eru fleiri av tykkum, sum eisini hava glett tykkum.
Vit hava í rúma tíð kunna fylgt við, hvussu hesin parturin av Skúlatrøð so við og við hevur broytt skap og útsjónd. Kanska onkur hevur undrast á, hvat hetta er fyri nakað. Hvat merkir hetta og hvussu fer listaverkið at síggja út, tá tað verður liðugt. Tað fær okkum at undrast og forvitnast.
Í samband við fyrsta byggistig av hesi verkætlan, bleiv ein bólkur settur at taka sær av listprýðinum.
Hesi vóru umframt meg sjálva:
Edvard Fuglø. Listamaður,
Vagn Foldbo, Skúlastjóri
Eyðbjørn Jacobsen, Læraraumboð
Mildrið Á Lógv, umboð fyri Skúlastýri
Svend Sivertsen, arkitektur hjá Fuglark
Signhild V. Johannesen, forkvinna í Mentanarnevndini
Tonja Sonharsdóttir, toymisleiðari fyri Børn og Ung
Og John Færø, trivnaðarstjóri
Tað er Edvard Fuglø sum er listamaðurin aftanfyri hetta stóra listaverki, sum ikki bert kemur at vera eitt prýði fyri skúlan, men fyri allan býin. Eg vil ikki fara nærri inn á sjálvt listaverkið, tí tað skal Edvard sjálvur sleppa at greiða frá.
Hjartaliga tillukku til tín Edvard og okkum øll við hesum týdningarmikla listaverki, sum uttan iva kemur at vera ein varði í føroyskari listasøgu og í okkara kommunu.
