FM 10 km: Marnar og Rebekka blivu føroyameistarar

Skriva hevur:

Treysti

25/03/2014 – 21:32

Leygardagin skipaði Roysnið fyri árligu Várkappingini. Hetta var samstundis FM í 10 km og seinasta umfarið í TF Vetrarkappingini. Suverenur føroyameistari hjá monnum bleiv Marnar Djurhuus og hjá kvinnum bleiv Rebekka Fuglø føroyameistari.

Umleið 80 rennarar luttøku

Líkindini vóru av teimum allarbestu leygarmorgunin kl. 11.00 tá startskotið bleiv latið av. Einir 80 rennarar vóru tilreiðar og spentu avstað. Tey vaksnu á DAF-góðkenda 10km teininum. Gentur og dreingir skuldu renna 5 km á somu rutu.

Marnar kemur um málstrikuna, sum vinnari við persónligum meti og undir kravið til Oyggjaleikir næsta ár

Marnar Djurhuus hevur allan vetur víst, at hann er í einum flokki fyri seg, og tað prógvaði hann so dyggiliga leygarmorgunin, tá hann vann ein tann tryggasta, um ikki tann tryggasta, sigurin nakar hevur vunnið við á 10 km teininum í Føroyum yvirhøvur. Hann vann við tíðini 32.18 min! Hetta er skjótasta 10 km tíð, sum er runnin á góðkendum teini í Føroyum. Hetta ger hann nú til triðskjótasta føroying á 10 km. Nú eru tað bert Albert Marni Joensen, sum eigur føroyska metið við 30.58 min. og Guttorm Sørensen við 31.28 min. sum hava runnið skjótari. Á øðrum- og triðjaplássi í FM komu Sam Vang og Eirikur Joensen úr Bragdið við 36.02 min. og 36.33 min.

Rebekka Fuglø hevur víst framgongd allan vetur, og hon setti sær sum mál at renna undir 40 min. fyri fyrstu ferð. Tann ætlanin helt til heilt seint í renningini, tá hon tíverri mátti steðga á eina løtu við búkilsku. Tað gjørdi at ætlanin brast, men hon gjørdist kortini tryggur FM vinnari við tíðini 40.12 min. Á øðrum- og triðjaplássi komu Rigmor N. Arge úr Hvirluni við 42.33 min. og Tórvør Ø. Vang úr Bragdið við 44.06 min.

Rigmor, Rebekka og Tórvør skjótastu kvinnurnar í FM 10 km

Í veterankappingini hjá monnum eydnaðist tað Guttorm Sørensen, eftir fleiri vánaligar kappingar í vetur, at vinna FM bronsuheiðursmerki við tíðini 38.09 min. Vinnari gjørdist Henry Olsen við 37.19 min. frammanfyri Cecil Weihe við 37.35 min. Teir renna báðir fyri Bragdið.