Komandi fríggjadag fara føroyskir miðnámsskúlanæmingar at kappast um FM heitið í Ungum Virki 2017
Komandi fríggjadag fara føroyskir miðnámsskúlanæmingar at kappast um FM heitið í Ungum Virki 2017
Undanfarin ár hava vit sæð nógv spennandi hugskot á torginum í SMS, tá ið næmingavirkini hava sýnt síni hugskot fram. Kappingin, sum samstundis er skipað sum ein sølustevna, er eitt gylt høvi hjá næmingunum at fáa royndir við at pynta ein bás, at samskifta við fólk, og marknaðarførslu sum heild.
Er íverksetan týdningarmikil?
Talið av íverksetarum økist í nógvum norðurlendskum býunum, og hetta er við til at skapa arbeiðspláss og vøkstur. Í útjaðaranum og norðurlendskum oyggjasamfeløgum er støðan ein heilt onnur, har nógv ung ikki flyta heim eftir loknan lestur, m.a. orsaka av manglandi starvsmøguleikum. Ein nýggj kanning, sum Norðurlendska Ráðharraráðið og Fonden for Entreprenørskab hava gjørt, vísir á, at undirvísing innan íverksetan kann venda negativu gongdini við m.a. fráflyting og læra ung fólk at hugsa nýskapandi, at síggja møguleikar á marknaðinum og at fremja hugskot í verki. Hetta er júst tað, sum undirvísing innan íverksetan fremur.
86 miðnámsskúlanæmingar
Í ár luttaka 18 næmingavirki í FM-kappingini, ið verður sett fríggjamorgunin kl. 10. Eisini letur framsýning upp fyri almenninginum, har møguleiki er fyri at vitja sølubásarnar og síggja næmingarnar leggja teirra virkishugskot fram.
Næmingavirkini, sum kappast um FM heitið í Ungum Virki, koma úr Tekniska Skúla í Klaksvík, Miðnámi á Kambsdali, og Glasi.
Umframt føroysku næmingavirkini luttaka eisini fimm útlendsk næmingavirkir sum gestir. Talan er um næmingar úr Finnlandi, Svøríki, Estlandi, Lettland og Litava. Íalt luttaka 86 miðnámsskúlanæmingar í tiltakinum.
Næmingarnir hava arbeitt við at menna eina vøru frá hugskoti til liðugt avrik. Teir hava lært, hvat skal til fyri at stovna og reka egið virki. Harumframt hava teir lært at bera ein boðskap fram og selja teirra hugskot.
Vinnulívið stuðlar undirvísing í íverksetan
Næmingarnir hava fingið ráðgeving og fíggjarligan stuðul frá EIK, ið er høvuðsstuðul hjá Ungum Virki.
Dómarar frá EIK, Vinnuframa, Íverksetarahúsinum, Hugskotinum, Vinnuhúsinum, Sendistovuni, Vodafone og SMS, fara at meta avrikini hjá næmingunum. Virkisætlanir, sølubásar og framløgur á palli verða eftirmettar. Harafturat skulu næmingarnir verja sína virkisætlan í 15 minuttir í sonevndari dómarasamrøðu fyri afturlatnum hurðum.
Tað verður spennandi at síggja, hvat ungu miðnámsskúlanæmingarnir hava arbeitt við og at hoyra teirra framløgur í SMS. Kappingin endar fríggjakvøldið kl. 18, har føroyameistarin í Ungum Virki 2017 verður kosin, og virðisløn verður handað. Fyrsta virðislønin er at luttaka í DM í Keypmannahavn, har kappast verður við teimum bestu næmingavirkjunum í Danmark.
Øll kunnu læra íverksetan
Øll kunnu læra íverksetan. Hetta er grundhugsjónin hjá Fonden for Entreprenørskap, sum Ungt Virki Føroyar er ein partur av. Vit hava kannað ávirkanina av arbeiði okkara millum tey ungu. Undirvísing í entreprenørskapi er við til at gera tey ungu meira áhugað í at ganga í skúla og betri før fyri at ímynda sær sína víðari útbúgving og starvsleið, soleiðis at tey síggja framtíðar møguleikar og fáa størri hug til at gerast íverksetar.
