Umleið 150 hvalir løgdu beinini í Hvannasundi í skýmingini hóskvøldið. Hetta er størsta grindin, sum leggur beinini í Norðoyggjum í 3 ár, og væl varð eisini tikið upp.
Seinnapartin hósdagin fann Tjaldrið eina grind suður úr Svínoynni. Grindin varð hildin til í Hvannasundi í skýmingini hóskvøldið.
Hálvtannaðhundrað hvalir løgdu beinini, og drápið gekk væl.
Grindin varð býtt til allar Norðoyggjar.
Tað eru áleið 3 ár síðan seinast, at ein stór grind leggur beinini í Norðoyggjum.
Tann parturin, sum fall klaksvíkingum í lut, varð førdur í lastbilum til Klaksvíkar, har grindin varð skorin upp á vestara havnarlag fríggjadagin.
Væl varð tikið upp, og longu á nátturða vórðu beinagrindirnar beindar burtur og havnaøkið spulað.
