Við tveimum málum móti einum vann føroyska U21 landsliðið hóskvøldið 2-1 á útivølli móti Íslandi. Málskjúttarnir vóru Mattias Hellisdal og Áki Samuelsen.
Ólavur Mikkelsen og hansara U21 menn stóðu hóskvøldið fyri einum framúrskarandi sigri á Thrótturleikvøllinum í Reykjavík í Íslandi.
Tað vóru bara farnir tríggir minuttir, so legði Mattias Hellisdal Føroyar á odda 1-0, og tá eitt stórt korter var spælt økti Áki Samuelsen um føroysku leiðsluna.
Sum fráleið løgdu íslendarar alsamt størri trýst á føroyska liðið, og tá 62 minuttir vóru farnir minkaði Ísland til 2-1.
Heimaliðið hevði bóltin nakað meir enn okkara, men føroyska verjan og málverjin stóðu stinn, og veruliga vandamikið gjørdist tað ongantíð.
Næsti dystur hjá føroyska U21 landsliðnum verður á útivølli týsdagin í komandi viku, tá Luksemborg tekur ímóti á Frontiere Stadion í Esch-sur-Alzette.
