Munnligur fyrispurningur til Jacob Vestergaard, landsstýrismann í fiskivinnumálum, viðvíkjandi at flyta makrelkvotu til 2021
Høgni Hoydal spyr soleiðis við hesum viðmerkingum.
1. Hvussu nógv av føroysku makrelkvotuni fyri 2020 er eftir at fiska – í tonsum og í prosentum?
2. Hvussu nógv er eftir hjá teimum skipum/reiðaríum, sum hava eginkvotur – í tonsum og í prosentum?
3. Um meira enn 10% eru eftir, tá ið árið er runnið, hvussu ætlar landsstýrið tá at loysa avbjóðingina við kvotunum til vinnuligar royndir og verkætlanir, sum ikki eru avgreiddar í 2020?
Viðmerkingar:
Í strandalandavtaluni um makrel millum Føroyar, ES og Noreg er ásett, at 10% av kvotuni kunnu flytast yvir um ár.
Tey skip/reiðarí, sum hava eginkvotur, hava rætt at flyta 10% av síni kvotu millum ár.
Samstundis vita vit, at makrelveiðan hevur verið heldur øðrvísi í ár, og at føroyska makrelkvotan ikki er uppfiskað.
Landsstýrismaðurin hevur júst boðað frá, at kvoturnar til vinnuligar royndir og verkætlanir fyri 2020 verða ikki avgreiddar í ár, men skulu flytast til 2021.
Tí er týdningarmikið at vita, hvussu nógv er eftir at fiska av føroysku makrelkvotuni, og hvussu nógv er eftir hjá teimum skipum/reiðaríum, sum hava eginkvotur.
Og hvat landsstýrið ætlar at gera við kvoturnar til vinnuligar royndir og verkætlanir, um meira enn 10% av kvotuni eru eftir, tá ið árið er runnið.
Á Løgtingi, 18. november 2020
Høgni Hoydal
