Skeiðsluttakarar á skeiðnum Kreativa Vikan, fingu eina heldur øðrvísi og forvitnisliga undirvísing frá Japansku listakvinnuni Yoko Matsumoto.
Yoko arbeiðir mest við at litað, veva og falda. Á skeiðnum greiddi Yoko frá hvussu hon arbeiðir við ymiskum tilfari, litum, mynstrum, strukturum, konstruktiónum, ljóð og ikki minst angan av tilfarinum, sum fær alt at ganga upp í eina hægri eind. Tað er serliga plantulitingin, sum gongur aftur í hennara listarverkum. Hon nýtir villan vøkstur úr náttúruni til liting. Yoko vísti skeiðsluttakarunum millum annað ymiskt spennandi silkigarn, sum var litað við ymiskum urtum og turkaðum píli úr Kunoy. Yoko greiddi frá, at tað fyri hana var sera umráðandi at arbeiða við náttúruni. Vit hava tørv á náttúruni og náttúran hevur tørv á okkum. Umráðandi er at finna eina javnvág.
Umframt plantulitað føroyskt tógv og grovt silkigarn, vísti hon okkum eisini tógv úr pappíri, sum hon brúkar saman við øðrum tógvi.
Yoko var sera hugtikin av tí fjølbroytta handarbeiðinum, sum verður undirvíst í á Húsarhaldsskúlanum og helt tað vera heilt fantastiskt hvussu væl vit hava megna at varveita okkara siðaarv.
Japansk handverk
Yoko hevði eina sera áhugaverda framløgu um Kimono, sum er tjóðarbúnin í Japan. Dagurin endaði við einari Origami verktstovu har øll fingu høvi at læra Japanska faldu teknikkin.
Várskeiðini hava verið sera væl vitjað og umleið 350 fólk hava verið á skeið á Húsarhaldsskúlanum. Hettar er síðsta skeiðið fyri skúlaárið 21/22.
