Tíðindaskriv frá Innlendismálaráðnum ger greitt at heimild er ikki fyri at skipað seg við fleiri borgarstjórum
Tíðindabræv: Skipan av kommunustýrinum
Vísandi til at fjølmiðlarnir í dag hava viðgjørt spurningin, hvørt eitt kommunustýri kann skipa seg við fleiri borgarstjórum ella ikki, skal Innlendismálaráðið gera hesar viðmerkingar:
Kommunuviðurskifti vera, sambært § 4 stk. 1 í kommunustýrislógini, stýrd av einum kommunustýri. Formaðurin í kommunustýrinum nevnist borgarstjóri. Borgarstjórin verður, sambært § 6, stk. 2. valdur millum kommunustýrislimirnar. Talan er um ein borgarstjóra og valið av honum hevur gildið alt valskeiðið.
Veljast skal eisini ein varaborgarstjóri, hvørs uppgáva er at vera í borgarstjórans stað tá hesum berst frá. Varaborgarstjórin verður valdur við meirilutavalháttinum. Kommunustýri kann í síni stýrisskipan áseta, at veljast skulu 1. og 2. varaborgarstjórar, sum so verða valdir eftir lutfallsvalháttinum. Valið av varaborgarstjóra hevur eisini gildið alt valskeiðið
Í § 20 er ásett, at borgarstjórin hevur dagligu leiðsluna av kommunalu fyrisitingini. Virkar varaborgarstjórin í borgarstjórans stað, tekur varaborgarstjórin yvir allar tær skyldur, ið liggja á borgarstjóranum.
Kommunustýrislógin heimilar ikki at seta fleiri borgarstjóra at stýra eini kommunu samstundis. Skipanir við fleiri borgarstjórum ella ráðsmonnum kenna vit m.a. frá teimum stóru kommununum í Danmark, har kommunustýrislógin heimilar teimum 5 størstu kommununum at skipa seg við magistratstýri, og verða borgarstjórarnir ella ráðsmennirnir tá valdir við lutfalsvalháttinum. Heimild er ikki fyri hesi skipan í føroysku kommunustýrislógini.
Í Tinganesi 18. november 2008
