Gamla løgreglustøðin í Klaksvík verður gjørd til bústaðir fyri fólk við serligum tørvi, sigur Elsebeth M. Gunnleygsdóttur landsstýriskvinna í Almannamálum
Mánadagin kom Elsebeth Mercedis Gunnleygsdóttur á gátt hjá Norðlýsinum. Hon vildi heilsa uppá okkum á Norðlýsinum og ynskja eitt gott nýggjár. Vit fingu eitt gott prát yvir ein kaffi-munn og tosað um leyst og fast.
Men tað tók ikki longi so tosaði landsstýriskvinnan við eldhuga um hennara politiska arbeiði.
Tríggjar spennandi verkætlanir fara í gongd nú heilt skjótt. Gamla løgreglustøðin í Klaksvík verður gjørd til bústaðir fyri fólk við serligum tørvi, vit seta pengar av til Dugna í Suðuroy og trý heim verða gjørd í Tórshavn, upplýsir landsstýriskvinnan.
Harumframt er bústaðarpakkin í løgtinginum, ið gevur Bústaðir 450 mió. krónur at byggja fyri. Harav skulu 200 mió. krónur brúkast til serligar verkætlanir – tildømis lestraríbúðir og búfelagsskapir til fólk við serligum tørvi, sigur Elsebeth M. Gunnleygsdóttur.
Landsstýriskvinnan er ein upptikin kvinna og fundarboð í Tórshavn gjørdu, at Elsebeth Mercedis Gunnleygsdóttur ikki fekk vitjað okkum so longi hesaferð.
