KÍ venjarin váttar, at hann hevur fingið eitt konkret tilboð úr Noregi um eitt venjarastarv.
KÍ venjarin váttar, at hann hevur fingið eitt konkret tilboð úr Noregi um eitt venjarastarv. Men hann hevur valt at halda fram í KÍ, har hann fyrr í ár gjørdi ein trý ára sáttmála.
In.fo skrivaði fríggjadagin, at KÍ venjarin Mikkjal K. Thomassen hevði fingið tilboð um venjarastarv í Noregi. Og sambært KÍ venjaranum sjálvum, so er tað eisini rætt. Men hann sigur eisini, at sum støðan er í løtuni, so verður hann venjari hjá KÍ í 2017.
– Eg havi – eftir mínum tykki – tað mesta spennandi venjarastarvið í Føroyum, har málið er at gera KÍ til eitt støðugt topplið. Og hóast eg havi fingið eitt konkret tilboð úr Noregi, so havi eg tikið avgerð um at halda fram í KÍ. So sum støðan er í løtuni, so verið eg venjari hjá KÍ í 2017, har eg trívist ótrúliga væl og har eg havi eina rúgvu av fólkum, sum eg njóti at arbeiða saman við til dagligt, sigur Mikkjal K. Thomassen við Norðlýsið.
Mikkjal hevur verið venjari hjá KÍ í 2015 og 2016. Har hevur hann fingið 101 stig í 54 landskappingardystum ella 1,87 í miðal. Fyrr í ár gjørdi hann sáttmála við KÍ fyri 2017, 2018 og 2019.
