Í dag endaði UEFA PRO-lisens útbúgvingin, ið er tann hægsta venjaraútbúgvingin í fótbólti, hjá norska fótbóltssambandinum, har KÍ-venjarin var ein av luttakarunum.
Norska fótbóltssambandið skrivar, at hetta vikuskiftið vóru venjararnir samlaðir fyri seinastu ferð á UEFA PRO-lisens útbúgvingini. Hendan útbúgving hevur vart í hálvannað ár. Ein av teimum 18 venjarunum, sum fullførdu útbúgvingina, var KÍ-venjarin Mikkjal K. Thomassen. Eisini vóru tveir venjarar frá Íslandi, Kristján Guðmundsson og Óli Stefán Flóventsson. Leiðarin fyri útbúgvingina, Dan Eggen, letur væl at.
– Tá tað ikki er møguligt at taka útbúgvingina í Føroyum og Íslandi, so eru vit blivnir eggjaðir av UEFA til at taka umboð frá hesum londum. Venjararnir sum taka UEFA PRO-lisens í Noreg mugu vera norskir ella skula arbeiða í Noreg.Tað var eisini ein treyt, at málið má ganga væl, so at einki verður mist í umseting. Tað hevur verið eitt pluss fyri bólkin at havt hesar luttakararnar úr Íslandi og Føroyum við, sigur Dan Eggen við heimasíðuna hjá norska fótbóltssambandinum.
Teir 18 venjararnir, sum hava fingið UEFA PRO-lisens í Noreg eru hesir:
Børje Sørensen
Håkon Grøttland
Kenneth Dokken
Kjetil Knutsen
Kristjan Gudmundsen
Mikkjal Thomassen
Oli Stefan Floventsson
Alexander Straus
Thomas Dahle
Vanja Stefanovic
Jørgen Isnes
Tarjei Smågesjø
Haakon Lunov
Amund Skiri
Bjarte Lunde Aarsheim
Arild Sundgot
Lars Petter Andressen
Øyvind Leonhardsen
Mikkjal er triði føroyingurin, sum fær hesa útbúgvingina, sum er tann hægsta í fótbólti. Hinir báðir eru Jógvan Martin Olsen og Bill M. Jacobsen.
