Seinast í hesum mánaðinum verður eykaaðalfundur í Føroya Reiðarafelag í samband við bygnaðarbroytingar – og í hesum sambandi hevur Jákup Sólstein boða limunum frá at hann leggur frá sær.
Jákup Sólstein kom upp í nevndina í Reiðarafelagnum fyrst í 80 unum og í hansara tíð sum formaður varð m.a. fiskidagaskipanin samtykt í løgtinginum.
– Vit fara at lýsa til aðalfund seinast í hesum mánaðinum har bygnaðarbroytingar eru á skránni. Í dag verða nevndarlimirnir í felagnum valdir úr ymisku landspartunum og vit fara at broyta tað soleiðis, at teir ymisku skipabólkarnir fáa umboðan í nevndina.
– Eg eri 67 ár og tí boðaði eg frá á seinasta aðalfundi – at tíðin var komin hjá felagnum at velja nýggjan formann.
Fiskivinnan stóran týdning
Hóast fleiri búskaparfrøðingar vilja vera við at fiskivinnan ikki hevur so stóran týdning longur í búskapinum, so er formaðurin í Reiðarafelagnum ikki samdur í hesum.
– Tað eru kanska ikki so nógv arbeiðspláss í fiskivinnuni í dag, sum tað vóru fyrr, men eg eri ikki í iva um at hon framvegis hevur avgerandi týdning fyri búskapin.
– Gongur tað væl í fiskivinnuni – so gongur tað eisini væl í føroyska búskapinum – og hinvegin gongur tað illa í vinnuni so gongur tað eisini illa í samlaða búskapinum.
Skilagóður diktator
Jákup Sólstein ásannar at tað ikki altíð er lætt at samansjóða tey ymisku sjónarmiðini í vinnuni.
– Tó haldi eg at eg havi klára hetta sera væl – tí sjálvdan hava limir í felagnum verið misnøgdir við tað sum eg sum formaður í felagnum havi gjørt.
– Men tað koma sera ymiskar útmeldingar frá vinnuni – men hetta er ikki eindømi fyri føroyska fiskivinnu. Sama skilið er í Norra og Íslandi.
– Skal eg siga sum er – so haldi eg at eg havi verið ein skilagóður diktator og í mínari verð er skilagott diktatur – tann besta skipanin.
Stórar avbjóðingar fyri framman
Spurdur um hvørjar avbjóðingar liggja fyri framman nevnir hann fiskivinnusamráðingarna við onnur lond.
– Tað eru altsamt fleiri røddir frammi, sum vilja hava útlendsku skipini burtur úr føroyskum sjógvi – og tað kemur uttan iva at ávirka framtíðar samráðingarnar við lond, sum Russland og Norra.
– Tí er spurningurin eisini hvussu leingi vit kunnu halda fram við sama fiskimynstri, sum vit kenna í dag og so er ES eisini ein spurningur.
– Men ES fiskivinnupolitikkurin kann ikki brúkast í Føroyum og tí dugi eg ikki at síggja nakra meingin í at fara upp í ES.
– Skullu vit gerast limir í ES, so mugu vit samráða okkum fram til ein avtalu har vit sjálvi sleppa at taka avgerðir viðvíkjandi føroyska fiskivinnupolitikkinum – og um tað er realistiskt – veit eg ikki.
Føroyingar meira globalir enn íslendingar
Formaðurin í Reiðarafelagnum sigur, at tað er trupult at hava eina meining um útlendska arbeiðsmegi – men í nógvum førum eru vit lagaligari enn grannalondini.
– Eg havi ikki hug til at gera viðmerkingar til at fáa bíliga útlendska arbeiðsmegi umborð á føroysk fiskiskip, tí tað málið er ikki aktuelt uttan so, at lógin verður broytt.
– Lógin sigur greitt at ein útlendingur, sum fara arbeiðsloyvi í Føroyum skal fáa føroyska tímaløn.
– Nógv hevur verið tosað um at útlendingar einans sleppa at eiga ein triðing í føroyskum vinnufeløgunum.
– Her eru vit nógv meira globalir enn eitt nú íslendingar og norrmenn. Teir loyva nevnuliga slett ikki útlendingum at eiga partabrøv í fiskivinnuni.
– Føroykir vinnulívsmenn sleppa slett ikki at keypa seg inn í norsk ella íslendsk feløg, men baði íslendingar og norrmenn kunnu keypa ein triðing í partabrøvum av føroyskum feløgum.
Fiska reyðfisk
Jákup Sólstein, skjótt fyrrverandi formaður í Reiðarafelagnum, sigur at hann ongar planir hevur um nakað – nú hann verður pensiónist.
– Eingin spyr ein 67 ára gamlan mann hvat hann ætlar sær, sigur Jákup skemtandi – og so leggur hann afturat.
– jú – eg ætli mær at fiska reyðfisk og skrubbir á Borðoyavík.
