Heilsan frá Miðlahúsinum.
In.fo skrivar: Í dag eru liðin hundrað ár, síðani Norðlýsið fyrstu ferð kom út, og lokalblaðið hjá norðoyingum heldur stóra dagin í allan dag. Tað verður gjørt í sólskini og góðveðri í Klaksvík.
Nú klokkan 10.00 lat blaðhúsið á Rygsvegi upp, og gjøgnum dagin eru fólk væl komin at støkka inn á gólvið á Norðlýsinum. Røður verða hildnar, grísur verður grillaður í túninum, tónleikur verður spældur, og annars verður møguleiki at heilsa upp á tey, sum varða av Norðlýsinum.
– Vit hava hava verið og eru lokalir, og tað hava vit verið bæði á skrift og í verki. Umframt at dekka norðoyggjar í okkara miðlum, hava vit eisini aktivt luttikið í nógvum verkætlanum í norðoyggjum, sigur Oliver Joensen, sum er blaðstjóri á Norðlýsinum.
Sonurin John William Joensen er stjóri á Norðlýsinum, og dótturin Hannefía Joensen er grafikari. Fleiri fríyrkisfólk eru eisini knýtt at blaðnum.
Miðlahúsið ynskir Norðlýsinum hjartaliga til lukku við hundrað ára degnum!
