Aftaná løgmaður hevði avdúkað minnissteinin, helt bóndin skemtiliga fyri at øll, sum vóru møtt úti á Kallinum til hesa løtuna, vórðu bjóðaði í ervi heima á garðinum.
Jóhannus Kallsgarð og konan, Eva Fimmbogadóttir Kallsgarð, høvdu gjørt nógv burturúr, har øll fingu bjóðað smyrjubreyð, smákøkur og ikki minst eina sera vakra James Bond 007 lagkøku.
Umframt góðan mat, undirhelt Rani Nolsø eisini við trimum vælkendum løgum frá Frændir og sær sjálvum.
Veðrið á Trøllanesi í dag var sum heild gott, og úti á Kallinum var mest sum stilli ta løtuna avdúkingin fór fram.
Myndirnar hevur Dávur Winther tikið.
