Allar 5 manningarnar, sum í summar fara at umboða Klaksvíkar Róðrarfelag í FM-róðrunum, luttóku um vikuskiftið í stuðulsrógving til frama fyri felagið. Sum tann fimta manningin róði old girls manningin leygarkvøldið, og tær stóðu seg bara heilt væl, samanborið við hinar manningarnar.
Nú er greitt, at manningarnar, sum fara at umboða KRF í kappróðri í summar, eru fimm í tali.
Páll Fangi er mannaður við bæði kvinnum og monnum, har báðar manningarnar eru hava rímiliga drúgvar royndir.
Síðani er Fípan Fagra somuleiðis mannað við bæði gentum og dreingjum tvær spennandi og ungar manningar, sum vit vónandi fara at síggja nógv til í framtíðini.
Seinasta manngin, sum í skrivandi løtu er fullmannað og klár rógva kapp, er old girls, sum eftir ætlan skulu rógva kapp við onkra aðra old girls manning, men sum skilst er tað ivasamt, um nøkur onnur old girls manning verður við í ár.
Um tað verður trupulleikin, hevði tað verið stuttligt, um tær ístaðin høvdu havt dirvi til at melda seg til genturóðurin við 5-mannaførum, har einki aldursmark er á kvinnusíðuni.
Neyvan hava tær vant eins nógv og tær yngru manningarnar, so neyvan er kondisjónin heilt tann sama, men um ein skal meta út frá teinunum, sum manningarnar róðu í stuðulsrógvingini, so smæðist old girls-manningin í øllum førum ikki burtur millum hinar manningarnar!
Okkum kunnugt so róðu manningarnar hesar teinarnar í stuðulrógvingini um vikuskiftið:
Páll Fangi menn 15000 metrar
Fípan Fagra dreingir 12500 metrar
Old Girls kvinnur 12000 metrar
Páll Fangi kvinnur 11000 metrar
Fípan Fagra gentur 11000 metrar
Neyvan kunnu teinarnir brúkast sum parametur fyri útlitunum í komandi FM-róðrunum, men stuttligt er tað kortini, at tann elsta manningin var so ófør at stuðla felagnum saman við hinum manningunum hjá KRF.
