– Høgni Hoydal eigur ikki at spæla við sínum politiska lívið sum landsstýrismaður, sigur Jenis av Rana formaður í Miðflokkinum
– Longu á fyrsta fundinum, gjørdu vit púra greitt at spurningar viðvíkjandi skrásettum parlag, skuldi parkerast komandi fýra árini!
– Høgni Hoydal nýtist ikki at spæla bíttur – tí tað er hann ikki!
– Tað er beinleiðis ein reingjan av veruleikanum um hann nú vil leggja upp til – at samgongulimir eru fríttstillaðir – skuldi eitt uppskot um skrásett parlag verið lagt fyri løgtingið.
– Um slík støða tekur seg upp og "skrásett parlag" verður samtykt í tinginum verður Høgni Hoydal ikki landsstýrismaður meira – tí tá er samgongan burtur – og tað veit formaðurin í Tjóðveldinum væl.
– Hetta var fyrsta málið vit tosaðu um í samgonguni og vit vóru samdir um at parkera hesar spurningarnar komandi fýra árini.
– Tað eru so nógv onnur mál – sum vit eru samdir um og tey skulu fremjast komandi fýra árini.
Luftin er reinsað
Formaðurin í Miðflokkinum sigur at høvuðsorðsøkin til at samgongusamráðingarnar gingu so skjótt og væl var at teir fyrst funnu eina semju um etisku spurningarnar.
– Allir uttan tveir samgongutingmenn vóru á hesum fyrsta fundinum og av tí at vit fingu hesar spurningarnar avgreiddar fyrst – bleiv andin undir sjálvum samgongusamráðinunum eisini sera góður.
– Tað er ein púra greið avtala í samgonguni – at verður uppskot um skrásett parlag viðgjørt í tinginum, so fellur samgongan tað – annars verður eingin samgongu longur, sigur Jenis av Rana, sum í løtuni er staddur uttanlanda.
