Gávukortið hjá Handilsfelagnum selir væl
Í dag vitjaði Norðlýsið á Norðoya Kunningarstovu at frætta hvussu gongur við nýggja gávukortinum hjá Klaksvíkar Handilsfelag, sum bert hevur verið til sølu í fáar dagar.
Fríðbjørg Pétursdóttir Justensen sigur, at faktiskt hevur gávukortið gingið sum heitt breyð. Eg haldi at tað hevur verið sera væl móttikið og vit hava longu nú selt nógv gávukort.
Søren Z. Jacobsen frá Klaksvíkar Handilsfelag sigur, at tað hevur verið ein tungur burður at fáa hetta gávukortið á marknaðin. Vit hava arbeitt við hesum digitala gávukortinum í samfull tvey ár, og hetta hevur kosta felagnum nógvan pening, men nú er tað so komið á marknaðin og eg haldi at tað er alneyðugt at handlar í Klaksvík hava eina slíka tænastu til viðskiftafólkið.
Ikki tí, vit hava havt gávukort í nógv ár, men fyrimunurin við hesum digitala kortinum er, at nú kunnu viðskiftafólk brúka kortið í øllum handlunum, sum eru limir í felagnum. lkki er neyðugt at brúka allan peningin á kortinum á sama stað og kortið heldur sjálvt skil á hvussu nógv er eftir á tí.
Fyri handlarnar, ið eru í hesi skipani hevur kortið eisini stórar fyrimunir, við tað at umsitingin av tí er lítil og eingin, sigur Søren Z. Jacobsen at enda.