Sjómansheimið er væl fyri at taka ímóti í summar
Tað sigur stjórin á Sjómansheiminum, Hotel Klaksvík, Jógvan Petersen. Í útgangsstøðinum, so er trupult at dríva hotell í Klaksvík. Orsøkin er, at tey flestu, sum koma hendavegin, vilja búgva í høvuðsstaðnum. Ein orsøk er helst sterka reklamuarbeiðið, ið verður gjørt frá og um høvuðsstaðin. Tað er helst eisini galdandi fyri støðuna í øðrum londum.
Men tíðirnar eru góðar júst nú og tað merkja vit eisini. Í vetur hevur verið nógv at gjørt á Sjómansheiminum, Hotell Klaksvík, tí nógv virksemið er í samfelagnum. Orsakað av byggingini av nýggjari smoltstøð á Strond, hava vit havt nógv arbeiðsfólk búgvandi. Eg rokni við, sigur Jógvan Petersen, at um tað ikki var fyri arbeiðsfólk, so høvdu vit bert havt heilt fáar gistingar í januar og februar.
Men nú koma bókingarnar inn, nú summarið nærkast. Háárstíðin hjá okkum er bert tveir mánaðir. Frá hálvum juni og til hálvan august hava vit vanliga fult hús og hinar mánaðirnar liva vit faktiskt av yvirskotinum hesar summarmánaðirnar.
Seinastu árini hava vit ný gjørt Sjómansheimið, soleiðis at vit í dag eru á einum støði ímillum tríggjar og fýra stjørnur. Vit hava 30 kømur við 70 seingjaplássum, so kapasitetinum feilar einki. Ný gerðirnar hava kosta umleið 8 milliónir krónur.
Fyri árum síðani, undir fíggjarkreppuni, góvust vit við at hava døgurða á middegi. Tó kunnu bólkar altíð fáa máltíðir, um biðið verður um tað frammanundan. Annars vísa vit á hini matstøðini úti í býnum, sigur Jógvan Petersen, stjóri á Sjómansheiminum, Hotel Klaksvík at enda.