Hetta er tíðin tá grindaboðini koma og tá heimapartar skulu býtast, ja, so gongur telefonin hjá sýslumanninum heit. Fólk vilja vita um tey eru uppi á listanum ella bátinum, sum tey hoyra til. 

Í Norðoyggjum hevur hendan skipanin nógv ár á baki. Ymsu bátarnir hava ein ella fleiri formenn, hvørs ábyrgd tað er at halda listarnar dagførdar, sum sýslumaðurin síðani býtur heimapartarnar eftir. Fólk doyggja, nýggj koma til, fólk flyta úr og til Klaksvík, so tað er eitt ávist skrásetingararbeiði at gera. Formenninir ringja runt at frætta um talið í húsarhaldinum og at enda verður listin latin sýslumanninum. 

- Vit uppliva at tá grindin er deyð, so fara telefonirnar hjá okkum at kima. Fólk vilja vita hvørjum lista tey eru á, spurningarnir eru nógvir. Vit hava ríkiligt um at verða annars, við at fáa grindina til høldar, so eg vil heita á formenninar at dagføra grindalistarnar, sigur Karl Johansen. 

- Vit fara at leggja grindalistarnar á heimasíðuna hjá Norðlýsinum í næstum. Hetta vil lætta um og skunda undir at listarnir verða ajourførdir regluliga, sigur Karl Johansen.