Gerst ein av teimum trimum landsstýrismaður, fær løgmaður sama trupulleika, nevniliga ein landsstýrismann, sum sigur “Fámjin fyrst”. So tað er lítið sannlíkt.

So eru Jónleif Johannesen, Kristianna Winther Poulsen, Helena Dam á Neystabø og Djóni Nolsøe Joensen eftir í tingmanningini, og tey eru øll fýra varafólk. Trý av teimum koma úr Suðurstreymoy, og tað er ikki júst har, Javnaðarflokkurin hevur tørv á at styrkja seg. Havnin er ein væl vardur skansi hjá Javnaðarflokkinum.

Tað leiðir okkum so til Tummas Lervig. Samgongan hevur ein stóran trupulleika við sínum “image” í Norðoyggjum, fyrst og fremst tí at flokkurin hevur tikið undir við politikkinum hjá Tjóðveldi á sjúkrahúsøkinum og fiskivinnuøkinum. Báðir politikkirnir hava ikki verið Norðoyggjum til fyrimunar, og tí er ikki ósannlíkt, at Javnaðarflokkurin vil styrkja seg í Norðoyggjum við at lansera eitt óskrivað blað, sum ikki hevur verið við til atkvøtt felags sjúkrahúsleiðslu og fiskivinnunýskipan ígjøgnum. Tummas Lervig er harumframt slektaður av Skála og Javnaðarflokkurin tørvar umboðan í Eysturoynni. 

Tummas Lervig er væl dámdur í Norðoyggjum, og er valdur bæði í býráðið og til formann í KÍ, so um nakar kann bøta um umdømið hjá Javnaðarflokkinum í Norðoyggjum, er tað hann. Tí er Tummas Lervig eitt gott boð uppá ein komandi landsstýrismann í samferðslumálum.