Vikuskiftisveðrið
Restirnar av tropisku ódnini Oscar fer at seta sín dám á veðrið hetta vikuskiftið. Hon er í morgun stødd miðskeiðis ímillum Írland og Nýfunnland. Lufttrýstið í miðjuni er 958hPa, og tað fer at lækka eitt sindur meiri í dag, meðan tað nærkast okkara leiðum.
Í morgin fer tað at grynnast, og tá ið miðjan er komin heilt til okkara á middegi sunnudagin, er trýstið komið upp á 980 hPa.
Øll lágtrýst hava síni egnu eyðkenni – eisini hetta – mesti vindurin kring Ex-Oscar er útsynningsmegin miðjuna; minsti vindurin er norðan fyri miðjuna, og tað er tann parturin, sum rakar okkum seint í kvøld og í morgin. Tíbetur.
Vindurin í løtuni (klokkan 11) er 3 til 8 m/s úr útsynningi. Tað er skýggjað og sólglottar. Yvirhøvur er turt kring landið, men avfall onkrasteðs. Hitin er ímillum 4 – 6 stig.
Eftir døgurða fer ættin spakuliga at flyta seg niður ímóti suðuri, og vindferðin fer at veksa.
Klokkan 17 eru 8 til 13 m/s úr suðuri – skýggjað, sólglottar; yvirhøvur turt men onkrir ælingar
Klokkan 19 eru 10 til 15 m/s úr landsynningi-suðuri – samdrigið og regn kring mestsum alt landið
Klokkan 21 eru 13 til 18 m/s úr landsynningi-suðuri – samdrigið og regn
Klokkan 23 eru 15 til 20 m/s úr landsynningi-suðuri – samdrigið og regn
….og soleiðis er til klokkan umleið 4 í morginári.
Um 4 tíðina fer vindurin at minka niður í 13 til 18 m/s úr suðuri, tað regnar framvegis men ikki soo illa.
Klokkan 8 í morgin ári er minkað niður í 8 til 12 m/s saman við ælaveðri.
Soleiðis fer fyrraparturin í morgin at ganga. Eitt sindur út á seinnapartin fer vindurin aftur at veksa eitt sindur – upp í 10 til 15 m/s úr suðuri. Framvegis ælaveður.
Í annaðkvøld veksur vindurin upp í 13 til 18 m/s úr landsynningi-suðuri, og tað fer at regna – og soleiðis er veðrið eftir øllum at døma líka til á middegi sunnudagin.
Tá fer miðjan á lágtrýstinum fram við Føroyum stutt vestanfyri.
Seinnapartin sunnudagin fer ættin aftur í útsynning ella vestan. Vindferðin fer at liggja um 5 til 10 m/s, og ælaveður.
Gott vikuskifti