Veðrið gamlaárskvøld
Tað er trupult at spáa um veðrið til nýggjárið hesaferð. Mátingar verða allatíðina gjørdar, og nýggjar forsagnir skrivaðar. Lágtrýstið, sum er avgerandi fyri veðrið ársins seinasta dag, kemur nær Føroyum, og bert lítil skal tí til fyri at tað, sum áður er skrivað, kortini ikki verður so.
Lágtrýstið fer eftir øllum at døma at koma eitt sindur nærri okkum, enn áður er mett, og tí fer at vera meiri vindur enn skrivað var á midnátt.
Leypa vit dagin í dag um og fara beint til morgindagin, so verður vindur allan dagin.
Fyrrapartin er vindferðin úr 15 til 20 m/s úr útsynningi. Eitt regnumráði kemur framvið fyrrapartin, men á døgurða er tað farið framvið, og so er turt.
Eitt sindur út á seinnapartin fer vindurin at veksa. Klokkan 17 eru 18 til 23 m/s – tó 20 til 25 m/s sunnanfjørðs. Hvirlurnar er sjálvandi væl harðari.
Eitt regnumráði kemur framvið seint seinnapartin, og eftir at tað er farið fram við Føroyum, fer ættin upp í útnyrðing. Hetta verður umleið klokkan 17-18.
Eftir klokkan 20 fer vindurin at minka spakuliga. Á midnátt er vindferðin komin niður í 15 til 20 m/s norðanfjørðs og 18 til 23 m/s sunnanfjørðs.
Enn einaferð, so sær soleiðis út í løtuni, og – enn einaferð – tað kann enn broytast.