Veðrið í vikuni
Vikan, ið kemur, fer at bjóða uppá eitt sindur av hvørjum veðri.
Lágtrýstini ferðast í hesum døgum av eysturstondini í USA fram við Suðurgrønlandi, tvørtur um Ísland, og so beint til Føroya.
Lágtrýstini eru ikki serliga djúp, so eingin stór megi fer at vera í teimum – so í stuttum er veðrið í viku 4 í 2019, at tað verður fyri tað mesta lítil vindur úr flest øllum ymsum ættum. Soleiðis er tað vanliga, tá ið lágtrýstini koma beint á okkum.
Men, vit skulu líka fyrst fáa tað fyrsta lágtrýstið í vikuni fram við okkum – tað er eitt sindur djúpari enn øll hini. Hetta verður í morgin – mánadag. Eftir tað eru tey smá og veik.
Mesti vindurin í allari vikuni verður seinnapartin mánadagin; tá fer fer vindferðin at vera 10 til 15 m/s úr suðuri og regn (helst eitt sindur meiri vindur sunnanfyri enn norðanfyri).
Týsdagin, mikudagin og hósdagin fer hann at mala úr ymsum ættum við lítlari ferð. Týsdagin vestan- og sunnaneftir; mikudagin av útnyrðingi og hósdagin av landnyrðingi.
Fríggjanátt aftur suðurætt og eitt sindur av vindi – um 10-12 m/s úr suðuri og regn. Restin av fríggjadegnum um útsynning - vindferðin undir 8 m/s.
Veðrið næsta vikuskiftið lati eg liggja – tað er alt ov langt burturi enn hjá nøkrum at geva eitt kvalifiserað boð…..